متهيأ لى لو عملنا إحصائية على شعب مصر و حسبنا عدد الناس اللى بترجع الدوا اللى بتاخده من الصيدليات , الى الصيدليات تانى ؛ حنلاقى قرية الشراقوة هى صاحبة المركز الأول فى الموضوع ده ..
ما تعرفش ده بقى بسبب الكرم الزيادة -اللى قلنا عليه قبل كده- .. ولّا بسبب الغنى الفاحش اللى هما فيه .. مش عارف بصراحة ..
تعالى احكيلك عن اللى حصل اللى النهاردة ..
السيدة المصون حرم جارنا داخلة الصيدلية و هى ناقص ترفع علينا المطاوى ..
-"الجزازة" دى "أنى" خدتها امبارح من شيماء بعد انت ما مشيت مع الدكتور الكبير .. و لقيتها مش هى اللى انا متعودة عليها .. و عايزة آخد التانية اللى انا متعودة عليها .. "دوكها" مش مسكرة زى اللى انا خدتها قبل كده ..
أبص ع الإزازة , ألاقيها "نيو ديجستين" شرب ..
-إيه اللى حصل يا شيماء ؟!
أبدا يا دكتور .. الحاجّة دخلت وصفت لى العلبة .. خضرا و فيها خط أبيض .. و هى أساسا فاتح للشهية .. و لسه بادوّر على حاجة بالمواصفات دى , لقيتها بتشاور ع الإزازة ورايا و بتقول لى : - أيوة هى دى الجزازة بتاعتى ..
-طب يا حاجة .. ايه اللى خلّاكى تغيرى رأيك ؟! ..
(و هى تتلفت حولها) الجزازة التانية كانت علبتها مخططة بالطول ..
طب ما قولتيش كده ليه م الأول ؟! .. ايش حال لو ما كنتيش مطلعة الإزازة بنفسك ؟!
تلمح السيدة الزجاجة التى كانت تريدها .. تخيلوا معى .. تطلع إيه ؟! .. ديجستين بس من غير "نيو" ..
و ترى السيدة الوقورة و كأنها "لقت لقيّة" .. جرت على الزجاجة و أخذتها و أخذت "تبوس فيها" .. و اللهِ ما باهزر ..
-أيوة دى جزازتى .. حبيبتى دى .. (و تشاور ع التانية) لكن دى مانيش عايزاها .. رجّعها دى .. مالهاش لازمة ..
-طب يا ستى .. مش انتى فتحتى الإزازة ؟!
-إيوة ..
-طب حطّى نفسك مكاننا .. نبيعها إزاى احنا دلوقتى ?!.. ما حدش حيرضى يشتريها عشان مابقتش "متبرشمة" زى الأول .. و بعدين مكونات دى زى مكونات دى بالظبط و الاختلاف فى حاجات بسيطة .. مش فارقة قوى يعنى ..
-ماليش دعوة .. (و تبوس فى الـ ديجستين) .. دى حبيبتى دى .. أنا عايزة دى, (و تشاور ع التانية) و مش عاوزة دى..
-(يظهر الوش التانى بقى) لا يا ستى .. معلهش مش حنقدر نرجّع حاجة ..
-طب أرميها يعنى ؟! .. خلاص .. أرميها "بَجَى"فى الـ"طرعة" و انا طالعة م الصيدلية ( فى أسى واضح)
-أقول لك ؟! .. عندكوا بط أو فراخ ؟! ..
-إيوة .. عندنا بطة و فرخة ..
خلاص اتحلت .. حطيها لهم فى المية .. يومين تلاتة حتلاقي نفسهم اتفتحت و ملوا كده و ربربوا ..
-طب و دى ؟! (ديجستين)
-أول ما يبقى معاكى 3 جنيه تعالى خديها ..
(تنظر إلىّ فى عتاب .. قلبى اتقطّع بصراحة ..)
-أى خدمة يا ستى .. تحت أمرك فى أى وقت ..
يا سلام لما بيرم التونسى قال: ما احلاها عيشة الفلاح .. متهنى البال و مرتاح ..
بس عم بيرم نسى يقول ان اللى بيكونوا قاعدين فى الصيدليات مع الفلاحين بيطلع عينهم فى الشغلانة دى ..
ربنا يصبرنا ..
نتقابل الفرسة الجاية ..
==============================
الفرسات السابقه
الفرسه رقم 1
http://anaalsaidaly.blogspot.com/2012/03/1.html
==============
الفرسه رقم 2
http://anaalsaidaly.blogspot.com/2012/03/2.html
==============
الفرسه رقم 3
http://anaalsaidaly.blogspot.com/2012/03/3.html
================
الفرسه رقم 4
http://anaalsaidaly.blogspot.com/2012/03/4.html
=================
الفرسه رقم 5
http://anaalsaidaly.blogspot.com/2012/03/5.html
===========================
تابعونا على جروب انا الصيدلى
http://www.facebook.com/groups/AnaAlsaidaly
=============================
0 التعليقات:
إرسال تعليق