الفرسة رقم ( 10 ) .. تروح و ترجع بالسلامة ..

طول عمرنا بنشوف مسلسلات و أفلام فى التليفزيون .. و طول عمر الممثلين بيمثلوا أدوار ريفية و صعيدية و احنا بنتفرج عليهم واحنا فاهمين كل اللى بيقولوه ..

ملحوظة: م الأول كده ..الفرسة بتاعة النهاردة المفروض يقراها كل خبير تخاطب .. و كل طبيب أطفال .. و كل دكتور ممكن يتعامل مع الصم و البكم ..

يا اخواننا الواحد بيتعرض بصراحة فى البلد دى لمصطلحات و أساليب فى التعبير عمره ما كان حيشوفها فى حياته .. فيه ناس عندنا فى الشراقوة المفروض لما يتكلموا يبقوا ما ينسوش يضيفوا شريط الترجمة أسفل الشاشة عشان نفهمهم من أول مرة ..

بس تصدق برضه .. الواحد بالخبرة بقى بيتعلم .. طبعا إنت لو بتشتغل زيي فى الأرياف حتبقى الفرسة دى زى الأكلة البايتة من غير طعم .. إلا لو كنت بتحب الأكل البايت ..

خد عندك يا سيدى .. مصطلحات جديدة للصبح .. (و ركز مع التشكيل):
-حُجْ كريم: جاية من كلمة "حُقْ" بالفصحة , أى : "علبة مدورة" من الكريم بتاع الوش ..
-الحتة دى ملبّشة ( و غالبا المريض حيكون بيشاور على وشه بالكامل .. حتلاقيه لزق باطن كفه على كل وشه) .. دى معناها : عندى احتقان فى الأنف .. !!!!
-الواد ابنى عنده "تُجْل" .. دى معناها إن الواد – ابنه – عنده tenesmus يعنى يدخل الحمام و هو مزنوق و ف الآخر ما يعملش حاجة .. يوجع دماغنا احنا بس يعنى ..
-الواد طالع له "حَرارة" ف وشه و "هوا" ف بقّه .. .. .. أول ما تسمع النشرة الجوية دى, اعرف علطول إن الواد ده عنده حبوب كتير , أهل المدن بيقولوا عليها "عرقة" .. ممكن تكون حساسية .. أما الـ"هوا" فدى الـ ulcer فى اللثة أو الخد من جوه أو اللى ممكن نقول عليها sores .. فسفوسة يعنى ..
العبد لله اكتشف ان كلمة "دواء" لها أكثر من معنى فى الأرياف .. و أهم المعانى دى حتعرفه لما تقرا الموقف ده:

مرة كان فيه قفطان و طاقية – و جواهم كائن بشرى- داخلين عليّه الصيدلية ..
-أوامرك يا حاج ..
-عايزين اللى مكتوب فى "الورجة" دى..
( أنظر فى الورقة لأجد كلمة واحدة .. "فلومكس" يعنى مكتوبة غلط كمان .. .. ليبدأ عندها فاصل جديد من فصول التنجيم الأصلى – على رأى دكتورة خطى ) ..
-يا حاج .. فلوموكس أقراص ..
-لأ "دوا"
-أيوة يا حاج .. ما هى الأقراص دوا ..
-لا أنا مش عايزها أقراص .. أنا عايزها دوا .. دوا ..
-طب أفهم بس ! .. يعنى حقن طيب ..؟! ...
-لا يا دكتور .. أنا عايزها دوا .. دوا .. دواااااااا ..
-يا سيدى ما هى الحقن دوا برضه ..
-لا أنا عايزها دواااااااااااااااااااا ..
-طب هى لمين طيب ؟!
-دى لبنتى ..
-أيوة يعنى عندها كام سنة ؟!
-عندها ف وش العدو خمسة ..
-خمس ايام ؟!
-لا .. خمس سنين يا دكتور ..
-بس خلاص .. يبقى شُرب .. انت عايز فلوموكس شُرب مش كده ..؟!
-الله ينوّر عليك ..
-طب ما تقول شرب يا راجل ؟! حتخس يعنى لما تقولها ؟! ..
-(بعد ما حطيته فى الكيس) طب و ده يتاخد إزاى يا دكتور ؟!
-(أطلّعه من الكيس تانى) حااااااضر .. حاكتب لك عليه الاستعمال و اقولهولك كمان .. (و انا باكتب ع العلبة ) .. ملعقة .. صغيرة .. كل .. ست .. ساعات ..
-يعنى "جُول" كده 4 مرات فى اليوم يعنى ..
-لا يا حاج .. تفرق .. أنا عايز الدوا ده يتّاخد بالدقيقة و بالثانية .. تبص فى الساعة و لما ييجى ميعاده تديه للبنت .. خلاص اتفقنا ؟!
-حتى لو كانت نايمة ؟!
-( و انا باكزّ على سنانى من الغيظ ) .. أييييوة يا حاج .. .. ياللا مع السلامة .. أى خدمة ..

طب الكلام ده ممكن يبقى سهل شوية عشان له علاقة بالصيدلية و الدوا .. أُمّال لو جات لك واحدة فى الصيدلية و هى بتقول لك: أنا ماعرفتش أجيب البت اللى عندها حبوب ف وشها عشان "جاعدة" فى الدار بـ"تفجّش اللب" ..
ساعتها حتقول إيه ؟! ..
معلهش .. أصلك مسكين ما تعرفش إنك "تفجيش اللب" معناه إن البت بتطلّع اللب الأسمر بتاع البطيخ من جوه البطيخ , عشان يحمّصوه بعد كده ..

هى دى الأرياف ..


امبارح جالى واحد بيسأل على كريم شعر أول مرة أسمع عنه .. سمعت قبل كده عن كريم شعر اسمه "بَلْمَظ" .. ؟! ..

دوّر عليه و لمّا تعرفه , ابقى قول لى .. عشان انا لغاية دلوقتى لسه ما عرفتوش ..


و من 5 دقايق شفت آخر المصطلحات اللى انضافت للقاموس الفريد بتاعنا ده ..

- انت اسمك إيه ؟!
- محمد ..
- عندك كام سنة يا ابو حميد ؟!
- أنا "رايح فى الاحداشر "..
- إه ؟!
-رايح فى الاحداشر ..
- ( كاتمًا ضحكى بالعافية) .. تروح و ترجع بالسلامة ان شاء الله ..

===========================

الفرسة رقم ( 1 ) .. البت بتدعك ف عينيها ..

الفرسة رقم ( 2 ) .. يوم أن جاءنى صلاح ..

الفرسة رقم ( 3 ) .. المضاد الحيوى و سنينه ..

الفرسة رقم ( 4 ) .. إنه عم على ..

الفرسة رقم ( 5 ) .. شركة المية .. من غير مية ..

الفرسة رقم ( 6 ) .. مأساة الديجيستين ..

الفرسة رقم ( 7 ) .. خفّافى .

 

الفرسة رقم ( 9 ) .. و الشنب كمان لو سمحت .

============================
تابعونا على جروب انا الصيدلى
http://www.facebook.com/groups/AnaAlsaidaly
============================= 

لا تنسى عمل شير لاصدقائك من الصندوق الموجود  بالأسفل .

الفرسة رقم ( 9 ) .. و الشنب كمان لو سمحت ..

تتميز قرية الشراقوة – زى ما انت عارف – بأن أهلها على قدر عال من الذكاء و المفهومية , بما يؤهلهم لشغل أرفع المناصب و تقلد أنبل الأوسمة ..

كان لازم طبعا أبدأ بالمقدمة الجامدة دى النهاردة , عشان خفت برضه تفهم كلامى عن أهل الشراقوة غلط ..

المهم .. فرسة النهاردة عبارة عن "كوكتيل فارسات صغيرين" لما يتجمعوا على بعض و ينضربوا فى الخلاط يطلعوا فرسة زى اللى نِفسى تقراها دلوقت ..

بقى يا سيدى الصيدلية دى زى كل الصيدليات .. اتفتحت بغرض واحد , ألا و هو بيع العقاقير الطبية و تقديم النصائح و الاستشارات الطبية برضه .. و ما يمنعش برضه لو بيعنا جنب الكلام ده علبة كريم أو إزازة زيت شعر .. اكسسوار يعنى ..
لكن الفرسة الكبيرة بقى هى إنك تلاقى طلبات عمرها ما تخطر لك على بال تنطلب منك و انت قاعد فى صيدليتك اللى فى الأرياف .. عايز أمثلة ؟! ...... معايا حتزهق من كتر الأمثلة ..
خد عندك ..
سيبك من اللى يجيلك الصبح ع الريق كده و عايز فكة 100 جنيه ..
و سيبك من اللى عايزنى أديله حقنة فى العضل من غير ما يدفع و لا مليم ..
لكن خد بالك معايا من اللى جاى و بيسأل على "حبر ختامة" ..
-نعم يا حاج ؟!
-"باجول لك" حبر ختامِة" ..
- لا ما عندناش يا حاج .. اسأل فى المكتبات ..
-(بص بقى الذكاء الفطرى) ليه ؟! .. هى مش دى صيدلية برضه ؟! ..
-(يا رب صبرنى) ما هو عشان دى صيدلية , مش حتلاقى حبر ختامة , و لو قصدك ع الحبر اللى فى الختامة بتاعتنا فده يا دوب مكفى الختامة بتاعتنا و ما بيتباعش .. أى أوامر تانية ؟! ..
-طب خلاص ما تزعلش نفسك .. طب فيه اقلام جاف ؟! ..
-(نظرة خاوية يصاحبها ضغط دم مرتفع مع الاكتفاء بعدم الرد..)

طب بلاش ده ..
بذمتك عمرك شفت واحدة تدخل لك الصيدلية و تسألك على .. إحم .. و اللهِ انا مكسوف أقولها .. معلهش استحملنى .. .. .. دبابيس شعر .. ؟!
زمانك عايز تعرف جات إزاى .. الست سألت على كريم للبشرة و لقاته .. و سألت على زيت شعر .. و لقاته .. و فى الآخر افتكرت إن احنا قلبناها محل خردوات و اكسسوار .. فسألت ع الدبابيس ..

طب خد التقيلة بقى ..
إحنا فعلا عندنا حبوب للزور .. برادورال ما انت عارفها .. و عندنا حبوب للحموضة .. جليكودال و أخواتها .. و ممكن كمان تلاقى حبوب للمغص و الانتفاخ و وقف النزيف كمان .. بس عمرى ما كنت اتصور إنى أتسأل فى يوم من الأيام على .. بنبونى بالنعناع ..

(و كما قال عم فؤاد المهندس الله يرحمه)
بتقولوا إيه ؟!
بنبونى بالنعناع
بتقولوا إيه يا ولاد ؟!
بنبونى بالنعنااااع ..

( وكما قال عم محمود القلعاوى)
شفتوا الهنا اللى انا فيه ؟!
هى دى الأرياف ..
و هو ده الشغل فى الأرياف ..

اليومين دول بقى انا مستنى اللى أكتر من كده .. أنا متوقع يجيلى واحد النهاردة أو بكرة .. و يدخل بكل عنطظة .. ليجلس على الكرسى البلاستيك اللى جنب الباب .. ليتحفنى بالجملة المتوقعة :
ياللا هات الفوطة البيضا بتاعتك و تعالى خُدْ لى دقنى و ما تنساش تظبط الشنب كمان و "تحنتفه" كده لو سمحت .. و الموس ما يبقاش مستعمل من فضلك .. !!!!!!!!

الفرسات السابقه
الفرسه رقم 1
http://anaalsaidaly.blogspot.com/2012/03/1.html
==============
الفرسه رقم 2
http://anaalsaidaly.blogspot.com/2012/03/2.html
==============
الفرسه رقم 3
http://anaalsaidaly.blogspot.com/2012/03/3.html
================
الفرسه رقم 4
http://anaalsaidaly.blogspot.com/2012/03/4.html
=================
الفرسه رقم 5
http://anaalsaidaly.blogspot.com/2012/03/5.html
===========================

الفرسة رقم ( 6 ) .. مأساة الديجيستين ..

===========================

الفرسة رقم ( 7 ) .. خفّافى .

============================
تابعونا على جروب انا الصيدلى
http://www.facebook.com/groups/AnaAlsaidaly
=============================  

لا تنسى عمل شير لاصدقائك من الصندوق الموجود  بالأسفل .

الفرسة رقم ( 7 ) .. خفّافى .. .يوميات صيدلى مفروس فى الرياف.

حد سمع قبل كده عن شغلانة اسمها .. ؟! ..إحم .. بصراحة مش عارف اسمها بالظبط .. بس اعرف ان اللى بيشتغلها بيقولوا عليه : بيشتغل فى الفاعل .. أيوة , هى بتتقال كده .. لو كنت سمعت عنها ؛ خير و بركة .. و ان كنت ما سمعتش ؛ فاسمح لى أقول لك إن الواحد فى الشغلانة دى بيفضل يشيل على كتفه الطوب و الزلط و الاسمنت و يطلع بيهم تلات اربع ادوار فى عمارة لسه بتتبنى .. يعنى تقدر تقول كده "عامل بناء" .. الغريب فى الشغلانة دى إن أفرادها بيقبضوا يومية يادوب تكفّيهم أكل عيش حاف و شرب مية من الحنفية .. يعنى حتى مش مية ساقعة ..

أهو أنا بقى اليومين دول , زى الجماعة دول .. إزاى يعنى ؟!
أقول لك يا سيدى ..
أولا أنا مش قصدى خالص على إنى لغاية دلوقتى ماقبضتش مليم أحمر من الحاج ع الشهرين اللى انا قاعدهم فى الصيدلية ( و اسمى باديرها ) .. و طبعا السبب معروف : انا باشتغل مع ابويا و عيب الواد يقبض من ابوه .. دى تبقى عيبة و -زى ما بيقولوا- : "خيبة بالويبة" ..
لا لا لا .. أنا مش قصدى على كده خالص .. لا سمح الله ..
لا أنا قصدى ع اليومين اللى فاتوا و اللى زى النهاردة كده ..
عارف ؟؟!! .. فيه أيام كده بتلاقى جالك بيعتين على روشتتين ورا بعض إنما إيه ؟! 10 على 10 .. و تلاقى درج الفلوس اتملى .. و العملية احلوّت .. و تلاقيك فكرت تقفل و تروّح .. ما انت خلاص .. لميت الغلة .. و لو الدنيا اتطربقت ساعتها انت مش حتزعل ..

و فيه أيام تانية .. ربنا ما يوريك .. زى اللى النهاردة كده ..
تخيل لمّا يبقى المتوسط بتاع كل يوم فى البيع هو 100 أو 200 جنيه .. و بعدين تلاقى النهاردة الشغل كماااااااان ضعيف .. لأ ده ضعيييييييف .. أو زى ما بيقولوا عليه تجار القماش و الستاير : خفّافى ..
حتصدقنى لما أقول لك إنى باكتب الكلمتين دول الساعة 4:56 مساءً و الدرج مافيهوش إلا 55 جنيه .. و مع ذلك .. بنقول : يا رب لك الحمد كما ينبغى لجلال وجهك و عظيم سلطانك ..
ثوانى .. أنا لازم أصحح لك مفهوم ممكن تكون فاهمه غير ما انا عايز .. ؟!
إنت فاكر إن ماحدش بيخش الصيدلية إلا نادر يعنى ؟! .. لا يا راجل .. ده النهارده بالذات الزباين كتير و عال العال .. بس – بعيد عنك برضه – الطلبات تفرس .. كلها من نوعية:
*حبايتين ستربتوكين ...
*واحدة بامبرز حجم متوسط ...
*فكة عشرة جنيه ...
*( اللى بتعلّنى بقى ) حباية مضاد حيوى 500 ..
*( أغلى طلب النهاردة ) شريط بيرجاتون ..

إلخ.. إلخ.. إلخ .. يعنى لا منه حتشتغل و تبيع كويس .. ولا منه حتستريح و تفرد ظهرك على كرسيين قدام بعض ..

ع العموم الحمد لله ..
أخوكوا راضى باللى مقسوم له ..


عارفين ؟؟!! .. الحاج دايما يقول لى : يابنى الصيدلية دى زى الواد الصغير اللى لسه بيرضع , لازم له فترة معينة عشان يقدر ياكل عادى .. و فترة كمان عشان يقدر يقوم و يقف على رجليه ..
و سبحان الله .. أنا دايما بارد ّعليه و اقول له: مش عارف ليه يا حاج , انا حاسس ان الواد بتاعنا ده عنده سوء تغذية أو ربنا واقف نموه .. يا حاج ده احتمال يكون عنده كساح ..

يا مسهل .. يا رب الواد يكبر و يطول لغاية لما يبقى أطول منى ..

ادعوا لنا ..

أخوكوا AUG

--------------------------------------------

الفرسات السابقه
الفرسه رقم 1
http://anaalsaidaly.blogspot.com/2012/03/1.html
==============
الفرسه رقم 2
http://anaalsaidaly.blogspot.com/2012/03/2.html
==============
الفرسه رقم 3
http://anaalsaidaly.blogspot.com/2012/03/3.html
================
الفرسه رقم 4
http://anaalsaidaly.blogspot.com/2012/03/4.html
=================
الفرسه رقم 5
http://anaalsaidaly.blogspot.com/2012/03/5.html
===========================
تابعونا على جروب انا الصيدلى
http://www.facebook.com/groups/AnaAlsaidaly
=============================